პროგნოზი

ზოგადად, მსუბუქი დაავადების მქონე პაციენტებში პროგნოზი საიმედოა; თუმცა, მძიმე დაავადების მქონე პაციენტებს ცუდი პროგნოზი აქვთ. პროგნოზი იცვლება სხვადასხვა ფაქტორის მიხედვით, როგორიცაა პაციენტის იმუნოლოგიური სტატუსი და ასაკი. ცუდ გამოსავალთან დაკავშირებული რისკფაქტორები მოიცავს ჰიპოტენზიას, ოლიგურიას, სიყვითლეს, ჰიპერკალიემიას და გულმკერდის პათოლოგიურ ხმიანობებს; ყველა წარმოდგენილია საწყისი შეფასებისას.[86][87][88] შემთხვევები, როდესაც გულმკერდის რენტგენოგრაფიაზე ფიქსირდებოდა კვანძები საჰაერო სივრცეში, დაკავშირებული იყო მძიმე ლეპტოსპიროზთან.[68]

ერთ-ერთი კვლევის თანახმად გამოვლინდა ორი ფაქტორი, რომელიც დამოუკიდებლად პროგნოზირებს მძიმე ლეპტოსპიროზის განვითარებას: კლინიკური სიყვითლე და გულის დაზიანება, რომელიც ვლინდება კლინიკურად ან ეკგ-ზე.[89] არანამკურნალევი ლეპტოსპიროზის მედიანური სიკვდილობის მაჩვენებელი იყო 2.2% ერთ სისტემატურ მიმოხილვაში, ფართო დიაპაზონით 0%-დან 39.7%-მდე.[73] იმუნური ფაზის დროს სიკვდილიანობა მერყეობს 5%-დან 40%-მდე.[2] სიყვითლის გარეშე ლეპტოსპიროზთან დაკავშირებული სიკვდილობა 1%-ზე ნაკლებია, ხოლო სიყვითლით მიმდინარე ლეპტოსპიროზი (ცნობილი, როგორც ვეილის დაავადება), რომელიც მოიცავს სიყვითლეს, ჰემორაგიას და თირკმლის მწვავე უკმარისობას, დაკავშირებულია 5-10%-იან სიკვდილობასთან.[50] ფილტვის სიხლდენით მიმდინარე მძიმე ლეპტოსპიროზის სიკვდილობის მაჩვენებელი არის >50%.[50]

სიკვდილი შეიძლება მოხდეს კარდიული არითმიების, გულის უკმარისობის, ან თირკმელზედა ჯირკვლის ჰემორაგიის შემდგომ.

მძიმე დაავადების რისკის ქვეშ მყოფი პოპულაციები

განსაკუთრებით აქტუალურია იმის აღნიშვნა, რომ ხანდაზმული ასაკი დაკავშირებულია უფრო მაღალ ავადობასთან და სიკვდილობასთან. სისტემურ მიმოხილვაში, რომელმაც შეაფასა არანამკურნალევი ლეპტოსპიროზის სიკვდილობა, 60 წელზე უფროსი ასაკის პაციენტებს ჰქონდათ სიკვდილობის მაჩვენებელი 60%.[73] ვეილის დაავადების მქონე ხანდაზმულ პაციენტებს უფრო მაღალი სიკვდილობა აღენიშნებათ.[5]

ორსულ პაციენტებს შეიძლება ჰქონდეთ განსხვავებული გამოსავალი.[54] ნაყოფს შეუძლია ინფექცია შეიძინოს მწვავე/საწყის ფაზაში პლაცენტური გადაცემის გზით; ასეთი კლინიკური სურათი შეიძლება გახდეს ნაყოფის სიკვდილის მიზეზი. ბაქტერიემიის არარსებობისას ნაყოფი და დედა შეიძლება იყვნენ ავადობის და სიკვდილობის რისკის ქვეშ, თუ დედა განიცდის ინფექციის მძიმე გართულებებს, როგორიცაა მაღალი ცხელება და ჰემოდინამიკური დარღვევები.[55] ქალებს უფრო ხშირად აღენიშნებათ სპონტანური აბორტი, თუ ლეპტოსპიროზი ხდება ორსულობის ადრეულ თვეებში.[11]

რეციდივები

ლეპტოსპიროზისგან გამოჯამრთელების შემდეგ პაციენტები შეიძლება გახდნენ იმუნურები იმავე სეროვარიანტით ან შტამით ხელახალი დაიფიცირების მიმართ. მიიჩნევა, რომ სეროვარის სპეციფიკური ანტისხეულები დამცავია, თუ მათი კონცენტრაცია მაღალია.[5]

ქრონიკული ლეპტოსპიროზი (თირკმლის გართულებები)

შეზღუდული მონაცემების თანახმად შეიძლება არსებობდეს კავშირი ლეპტოსპიროზსა და თირკმელების ქრონიკულ დაავადებას შორის, მაგრამ საჭიროა უფრო ფართო კვლევები იმის დასადასტურებლად, არის თუ არა ლეპტოსპიროზი თირკმელების ქრონიკული დაავადების რისკის ფაქტორი.[90]

ამ მასალის გამოყენება ექვემდებარება ჩვენს განცხადებას